Siz Ginbingz
Gak boux dungzci：
Cunghyangh Cwngcigiz dak hawj gou youq gwnz cienzhoih gangjmingz gij cingzgvang mizgven dajgauj 《Aen Gietdingh Cunghgung Cunghyangh Gvendaengz Caiq Cienzmienh Gyalaeg Gaijgwz、Doihaeuj Gij Yendaiva Yiengh Cungguek》.
It、Doekdingh Aen Lwnhdaez Cienzhoih Aeu Ngeixnaemj Gijmaz
Hopheux gij cungsim yinvu aen Dangj bae maeuzveh caeuq baijbouh gaijgwz, dwg gij gingniemh dijbauj aen Dangj lingjdauj gaijgwz hailangh. Daj gij gingniemh saedguh caeuq gij aeuyungh yienhsaed bae ngeixnaemj, Cunghyangh Cwngcigiz gietdingh Baez Sam Cungh Cienzhoih Gaiq Ngeihcib aen Dangj yenzgiu gij vwndiz caiq cienzmienh gyalaeg gaijgwz、doihaeuj gij yendaiva yiengh Cungguek, cujyau ngeixnaemj geij fuengmienh lajneix.
Daih’it, neix dwg gietcomz simvunz、gyonjcomz rengzvunz, guhcaez gij cungsim yinvu seizdaih moq gwnz roen moq aen Dangj gaenj aeu baenzneix guh. Saedguh gaenq cwngmingz liux, youq aen seizgeiz moq gaijgwz hailangh caeuq hwnqguh sevei cujyi yendaiva, guek raeuz ndaej byaij yamq hung gyaep hwnj seizdaih, couh dwg baengh gaijgwz hailangh. Cibbet Daih aen Dangj doxdaeuj, gij saehnieb Dangj caeuq guekgya ndaej miz gij cwngzciu hab geiq haeuj lizsij、guh ok gij bengwz hab geiq haeuj lizsij, hix dwg baengh gaijgwz hailangh. Youq seizdaih moq gwnz roen moq, yaek hawj hwnqguh gij yendaiva yiengh Cungguek haicauh aen buenzmienh moq, vanzlij aeu baengh gaijgwz hailangh. Ngeihcib Daih aen Dangj laebdingh le gij cungsim yinvu aeu cienzmienh hwnqbaenz aen guekak sevei cujyi yendaiva、aeu guhbaenz gij moegbiu buekguh aen bak bi daihngeih, aeu yungh gij yendaiva yiengh Cungguek bae cienzmienh doi hawj Cunghvaz Minzcuz fukhwng hungmbwk, lwnhgangj le gij yendaiva yiengh Cungguek miz maz daegsaek Cungguek、miz maz bonjcaet iugouz、miz maz yenzcwz hungnaek daengj, doiq doihaeuj gij yendaiva yiengh Cungguek guh’ok canloz baijbouh. Aeu caencingq yungh ndei gij canloz baijbouh neix, hawj gij yendaiva yiengh Cungguek daj mbaw lamzdoz bienqbaenz huqsaed, goekgaen de dwg aeu caiq cienzmienh gyalaeg gaijgwz, mboujduenh laebndei gij dijci gihci gak fuengmienh, daj gwnz cidu bae baujcang gij yendaiva yiengh Cungguek ndaej coi guh baenaj.
Daihngeih, neix dwg laebndei caeuq hwngfat aen cidu sevei cujyi miz gij daegsaek Cungguek、coi hawj aen dijhi ceihleix caeuq gij naengzlig ceihleix guekgya hab yienhdaih gaenj aeu baenzneix guh. Cibbet Daih aen Dangj doxdaeuj, raeuz lai cuengq rengz haeuj laebndei cidu diuz cawjsienq neix, doenggvaq cienzmienh gyalaeg gaijgwz bae laebndei gij cidu gak fuengmienh, doi hawj yiengh cidu sevei cujyi miz gij daegsaek Cungguek engqgya caezcienz engqgya dinghyiengh, hawj aen dijhi ceihleix caeuq gij naengzlig ceihleix guekgya engqgya hab yienhdaih bae, daj gwnz cidu mizrengz bae baujcang cienzmienh hwnqbaenz aen biengz siujgangh. Doengzseiz, aeu singjsag raen daengz, laebndei yiengh cidu sevei cujyi miz gij daegsaek Cungguek dwg aen gocwngz bienqvaq ndeu, itdingh yaek riengz saedguh hwngfat cix mboujduenh hwngfat, gij cidu gaenq miz aeu laebcaez roengzbae, lingjyiz moq saedguh moq aeu doicaenh cauhmoq cidu、dienzbouj gij cidu caengz laeb de. Najdoiq gij hingzseiq moq caeuq yinvu moq, bietdingh aeu caiq cienzmienh gyalaeg gaijgwz, laebdaeb laebndei gij cidu gihci gak fuengmienh, gyamaenh goekdaej、langh’ok gijndei、boujcaez gaiq dinj、guh’ak giz nyieg, mboujduenh hawj gijndei cidu guek raeuz engq ndei cienjvaq baenz gij yauqnaengz ceihleix guekgya.
Daihsam, neix dwg nyoengx hawj caetliengh sang bae hwngfat、 engq ndei hab’wngq gij cujyau mauzdun ndawbiengz guek raeuz bienqvaq gaenj aeu baenzneix guh. Seizneix, nyoengx hawj caetliengh sang bae hwngfat roeb daengz gij vwndiz youqgaenj de ciuqyiengh dwg hwngfat mbouj doxdaengh mbouj gaeuq doh. Lumjbaenz, hawciengz dijhi lij mbouj caezcienz, hawciengz fatmaj lij mbouj gaeuq ndei, gij gvanhaeh cwngfuj caeuq hawciengz lij caengz leixswnh liux, gij bonjsaeh cauhmoq coengh mbouj ndaej yiengh hwngfat caetliengh sang, canjnieb dijhi cingjdaej hung cix mbouj ak、caez cix mbouj cing, gij gisuz ceiq youqgaenj deng guekrog gaemhanh cungj cingzgvang neix lij caengz ndaej daj goekgaen bae gaijbienq, aen giekdaej nungzyez lij caengz onjmaenh, ranghdieg singz mbanj hwngfat caeuq souhaeuj faenboiq lij cengca haemq hung, youq baujcang beksingq gwndaenj、baujhoh swnghdai vanzging fuengmienh lij miz giz mbouj gaeuq ndei, daengjdaengj. Gyonj hwnjdaeuj gangj, doengh gij vwndiz neix fanjyingj ok gij cujyau mauzdun ndawbiengz miz le bienqvaq, dwg gij vwndiz mwh hwngfat mizok, bietdingh aeu caiq cienzmienh gyalaeg gaijgwz, daj dijci gihci bae doinyoengx gaijgez.
Daihseiq, neix dwg wngqdoiq saeh yiemj saeh nyex、doinyoengx aen saehnieb Dangj caeuq guekgya byaij onj bae gyae gaenj aeu baenzneix guh. Doihaeuj gij yendaiva yiengh Cungguek dwg hangh saehnieb moq ndeu, gwnz roen baenaj bietyienz yaek roeb daengz gak cungj mauzdun caeuq saeh yiemj saeh nyex. Daegbied dwg dangqnaj aen hingzseiq boekbienq seiqgyaiq bak bi caengz miz gvaq neix gyavaiq yienjbienq, mbangj dieg doxhoenx caeuq doenghluenh lailai, gij vwndiz nangq daengx seiqgyaiq de engqgya haenqrem, gij yienghsaeh naenxhaed daj baihrog daeuj de yied daeuj yied haenq, guek raeuz hwngfat haeuj daengz mboengq canloz seizgei caeuq saeh yiemj saeh nyex caemhyouq、gij yinhsu nanz dingh nanz liuh haenx demlai, gak cungj saehgienh “hanqmbwn ndaem”、 “vaiz mong” seiz lawz cungj gojnaengz mizok. Yaek wngqdoiq ndei gij saeh yiemj saeh nyex neix, youq gij doxdax gwnz seiqgyaiq ngoenz beij ngoenz haenq de ndaej gaem canloz youq ndaw fwngz raeuz, iugouz raeuz caiq cienzmienh gyalaeg gaijgwz, yungh roix cidu caezcienz bae fuengzre vaqgej saeh yiemj、wngqdoiq ndei saeh nyex, youq ndaw veizgih ganq ok seizgei moq、youq ndaw hingzseiq boekbienq hai aenbuenz moq.
Ngeih、Aen Gocwngz Dajgauj Gietdinghgauj Dwg Yienghlawz
2023 nienz 11 nyied, Cunghyangh Cwngcigiz gietdingh, laebbaenz aen cuj dajgauj gij vwnzgen Baez Sam Cungh Cienzhoih Gaiq Ngeihcib aen Dangj, youz gou dang cujcangj, Vangz Huningz、Cai Giz、Dingh Sezsiengz dungzci dang fucujcangj, youz Cunghyangh Cwngcigiz Cangzveijvei lingjdauj, bae rapdawz gaiq hong dajgauj vwnzgen. 12 nyied 8 hauh, aen cuj dajgauj vwnzgen ciuhai baez hoih daengxcungq daih’it, cingqsik hainduj guh gaiq hong dajgauj vwnzgen. 7 ndwen lai neix, aen cuj dajgauj vwnzgen haeujlaeg diucaz yenzgiu, dauqcawq cam’aeu yigen, bae guh ciendaez lwnhcingq, fanjfuk yaenglwnh coihgaij.
Youq aen gocwngz dajgauj gietdinghgauj, dou cungdenj dawzndei geij diemj lajneix: It dwg cungjgez caeuq yunghndei gij gingniemh dijbauj gaijgwz hailangh doxdaeuj daegbied dwg cienzmienh gyalaeg gaijgwz seizdaih moq, doekdingh gij yenzcwz ciuqei, dawzdingh aen cwngci fuengyiengq cingqdeng. Ngeih dwg gaenjndaet hopheux doihaeuj gij yendaiva yiengh Cungguek、doeksaed gij canloz baijbouh Ngeihcib Daih aen Dangj daeuj maeuzveh baenzlawz caiq cienzmienh gyalaeg gaijgwz, dingjmaenh aeu vwndiz daz guh. Sam dwg gaemdawz cungdenj, doedok gaijgwz dijci gihci, doedok yiengh gaijgwz hungnaek gvanhaeh daengz canloz、daengxbuenz, doedok gij cozyung bengrag oklaeng gaijgwz ginghci dijci, doedok gij cozyung baengh gaijgwz bae yinxlingx haenx. Seiq dwg dingjmaenh cuengq yinzminz youq vih daih’it, daj gij leih’ik daengxcungq、leih’ik gaenbonj、leih’ik gyaeraez yinzminz bae maeuzveh caeuq doicaenh gaijgwz. Haj dwg gyaak hidungj gyonjcomz, gyarengz baenz cingjdaej bae maeuzveh、baenz hidungj bae baijbouh gaijgwz, hawj gak fuengmienh gaijgwz dox boiqhab caiqlix doxcoengh ndei vaiq.
Dajgauj gij vwnzgen baez cienzhoih neix, daj goek daengz byai cungj hwngcienz minzcuj、comz yigen ndei. 2023 nienz 11 nyied 27 hauh, Dangjcunghyangh fatok dunghcih, cimdoiq gij lwnhdaez Baez Sam Cungh Cienzhoih Gaiq Ngeihcib aen Dangj bae cam’aeu yigen gak dieg gak bouhmonz gak fuengmienh caeuq mbangj ganbu ginzcung. Daihgya doengzcaez nyinhnaeuz, Dangjcunghyangh gietdingh Baez Sam Cungh Cienzhoih Gaiq Ngeihcib aen Dangj cungdenj yenzgiu aen vwndiz caiq cienzmienh gyalaeg gaijgwz、doihaeuj gij yendaiva yiengh Cungguek, yienh’ok le aen gietsim geng’ak caeuq gij sawjmingh dangrap haenqrem guh gaijgwz daengzdaej bae, caiq baez naeuz hawj vunz lajmbwn rox, youq seizdaih moq gwnz roen moq raeuz yaek yaengx mbaw geiz lawz、byaij diuz roen lawz, doiq aeu gij yendaiva yiengh Cungguek bae cienzmienh doicaenh hwnqguh aen guekak、doinyoengx aen saehnieb minzcuz fukhwng hungmbwk miz gij eiqngeih hungnaek youh gyaeraez de. Gak dieg gak bouhmonz gak fuengmienh doiq vwnzgen dingh gijmaz cawjdaez、 baenzlawz nda gvaengxgyaq、yungh gij cosih youqgaenj lawz daengj daezok haujlai genyi dijbauj, vih dajgauj gietdinghgauj daezhawj le gij camgauj youqgaenj.
2024 nienz 5 nyied 7 hauh, gietdinghgauj fat hawj mbangjdi vunz ndaw Dangj bae cam’aeu yigen, cam’aeu gij yigen gyoengq dungzci geq ndaw Dangj, cienmonz dingqaeu gij yigen doengh bouxdaeuz gak minzcuj dangjbai cunghyangh、Daengx Guek Gunghsanghlenz caeuq doengh boux daibyauj gyoengqvunz mizmingz mbouj haeuj dangjbai, dingqaeu gij yigen mizgven giyez caeuq lauxhangz lauxhag. Daj gij yigen ndaej dauq de daeuj yawj, daihgya doengzcaez nyinhnaeuz, gietdinghgauj gaenjndaet hopheux aen cawjdaez doihaeuj gij yendaiva yiengh Cungguek bae maeuzdingh gij canloz cosih caiq cienzmienh gyalaeg gaijgwz, dawzdingh aen cwngci fuengyiengq cingqdeng, roengzrengz gaemndaet gij vwndiz hungnaek oklaeng dijci gihci mwh doihaeuj gij yendaiva yiengh Cungguek aeu buqgej haenx bae maeuzveh gaijgwz, cawjdaez sienmingz, cungdenj doedok, cosih saedcaih、hengz ndaej, dwg gij cungjdungyenz、gij cungjbaijbouh youq seizdaih moq gwnz roen moq doinyoengx cienzmienh gyalaeg gaijgwz guh haeuj gvangq haeuj laeg, lailai yienh’ok le aen Dangj gagrox bae laebndei caeuq hwngfat aen cidu sevei cujyi miz gij daegsaek Cungguek、gyavaiq guh aen dijhi ceihleix caeuq gij naengzlig ceihleix guekgya hab yienhdaih, itdingh yaek ndaej daezhawj rengznyoengx hungloet bae coengh gij yendaiva yiengh Cungguek caeuq daj gwnz cidu bae baujcang de. Doengzseiz, gak fuengmienh daezok le 1911 diuz gij yigen caeuq genyi coihgaij. Aen cuj dajgauj vwnzgen nyinhcaen yenzgiu doengh gij yigen caeuq genyi neix, ndaej souaeu couh caenhliengh souaeu, gaij le 221 giz.
Youq aen gocwngz dajgauj vwnzgen, Cunghyangh Cwngcigiz Cangzveijvei hai hoih 3 baez、Cunghyangh Cwngcigiz hai hoih 2 baez bae saemjlwnh、coihgaij, raiz baenz le faenh gietdinghgauj daezcingj baez cienzhoih neix saemjlwnh haenx.
Sam、Aen Gvaengxgyaq Guhgiek Caeuq Gij Neiyungz Youqgaenj Gietdinghgauj Dwg Gijmaz
Gietdinghgauj cawzok vahyinx caeuq vahsat, miz 15 aen bouhfaenh, faen baenz sam aen neiyungz hung. Aen bouhfaenh nduj dwg aen neiyungz hung daih’it, dwg gyoeblwnh, cujyau lwnhgangj caiq cienzmienh gyalaeg gaijgwz、doihaeuj gij yendaiva yiengh Cungguek miz maz eiqngeih hungnaek caeuq miz maz cungjdaej iugouz. Daihngeih daengz daih cibseiq bouhfaenh dwg aen neiyungz hung daihngeih, dwg faenlwnh, cujyau daj ginghci、cwngci、vwnzva、sevei、swnghdai vwnzmingz、guekgya ancienz、gozfangz caeuq bingdoih doengh fuengmienh neix bae baijbouh gaijgwz. Daih cibhaj bouhfaenh dwg aen neiyungz hung daihsam, cujyau gangj gyaak aen Dangj lingjdauj gaijgwz、gyalaeg gaijgwz gij cidu gensez aen Dangj、guh gaiq hong dangjfungh lenzcwng caeuq fanj nduknaeuh doucwngh. Neiyungz diuzmoeg daengx bien baiz gonqlaeng, lied baenz 60 diuz.
Gietdinghgauj dawzdingh aen moegbiu daengz 2035 nienz daihdaej guhdaengz yiengh yendaiva sevei cujyi, lai cuengq rengz bae baijbouh gij gaijgwz cosih hungnaek haj bi laeng neix, youq mwh anbaiz neiyungz miz geij aen daegdiemj lajneix.
Daih’it, yawjnaek doenggvaq gaijgwz ginghci dijci daeuj ragdoengh. Gyalaeg gaijgwz ginghci dijci vanzlij dwg caiq cienzmienh gyalaeg gaijgwz giz aeu dawznaek guh de, cujyau yinvu dwg laebndei gij dijci gihci ikleih doinyoengx yiengh hwngfat caetiengh sang, ganq ok gij rengznyoengx moq gizak moq bae doinyoengx hwngfat, dingjmaenh caeuq hengzndei “song aen mbouj doenghngauz saekdi”, cauhguh aen hawciengz hung daengx guek doengzcaemh, laebcaez gij cidu giekdaej hawciengz ginghci.
Gietdinghgauj hopheux cawqleix ndei doiq gvanhaeh cwngfuj caeuq hawciengz aen vwndiz ceiq youqgaenj neix, engqgya dawznaek cauhlaeb aen dijci yiengh hawciengz ginghci sevei cujyi suijbingz sang, doiq gaijgwz ginghci dijci aen lingjyiz cungjdenj caeuq giz hothoh youqgaenj de guh’ok baijbouh. Daj dem’ak gij goengnaengz ceiq youqgaenj giyez guekmiz、hawj gij rengz doxdax ceiq youqgaenj de engq ak bae naemj, daezok gyarengz hawj gak aen bouhmonz guenjleix mizgven ciuq canloz caez guh, coi hawj ginghci guekmiz gaijndei baijbouh caeuq diuzndei gapgyaq, nyoengx hawj swhbwnj guekmiz caeuq giyez guekmiz guh ak guh ndei guh hung；daj doinyoengx yiengh ginghci mbouj dwg gunghyoujci hwngfat bae naemj, daezok ceiqdingh aen fap coicaenh minzyingz ginghci, gyarengz doenggvaq dawzfap caepfap baujhoh canjgienz, fuengzre caeuq niujcingq gij yienghsaeh aeu soujduenh hingzcwng、hingzsaeh bae capfwngz ginghci cengnauh. Daezok gyarengz ap guh saemjcaz goengbingz doxdax, cingleix caeuq feiqcawz gak cungj gvidingh caeuq guhfap gazngaih daengx guek gyoeb guenj hawciengz caeuq goengbingz doxdax, laebndei gij cidu caeuq gveihcwz aen hawciengz yausu, daengjdaengj. Doengh gij guhfap neix yaek hawj daengx biengz gagrox haenq guh youh maij cauhmoq.
Gietdinghgauj doiq laebcaez gij dijci gihci doinyoengx ginghci caetliengh sang bae hwngfat、coihawj yiengh swnghcanjliz akmoq fazcanj guh’ok baijbouh. Hopheux hwngfat gij swnghcanjliz aeu gisuz ak、yauqnaengz lai、caetliengh ndei guh mai haenx, daezok lai laeb cidu hawj aen lingjyiz moq diuz roen doxdax moq, laebhwnj gij gihci gyalai douz cienz guh yiengh canjnieb daengzcog, ciuq gij biucinj guekgya bae daezswng dazyinx yiengh canjnieb ciuh cienz ciuh haenx gaijndei swnggaep, coicaenh gak loih gaiqyiengh akmaenh swnghcanj comz haeuj yiengh swnghcanjliz akmoq.
Gietdinghgauj doiq laebcaez aen dijhi ceihleix hungzgvanh ginghci guh’ok baijbouh. Daezok laebndei aen dijhi guekgya canloz gveihva caeuq aen gihci doengbuenz hezdiuz cwngcwz；gyoebgyonj doihaeuj gaijgwz aen dijci caizsui, lai hawj deihfueng gag dawz cienz yungh cienz, haigvangq goekgvaeh deihfueng, hableix gyadaih aen gvaengx yungh mbawcaiq cienhangh cwngfuj deihfueng, habdangq gyaak gij saehgienz cunghyangh、daezsang aen beijlaeh cunghyangh caizcwng ceiok； laebndei gij dinghvih ginhyungz gihgou caeuq guhndei ceihleix, laebcaez gij goengnaengz swhbwnj hawciengz douzswh caeuq yungzswh doxha haenx, laebndei aen dijhi gamguenj ginhyungz.
Gietdinghgauj doiq laebndei gij dijci gihci hawsingz lajmbanj yungzhab hwngfat guh’ok baijbouh. Daezok laebcaez aen dijci gihci doicaenh gij cwngzcinva yienghmoq；gyamaenh caeuq laebndei aen ginghyingz cidu giekbonj lajmbanj；laebcaez aen cidu haeujcoengh guh’ak nungzyez youh hawj bouxguhnaz ndaej leih bienq fouq；gyalaeg gaijgwz aen cidu diegdeih.
Gietdinghgauj doiq laebndei aen dijci gihci doiq rog hailangh suijbingz sang guh’ok baijbouh. Daezok onjbouh gyadaih hailangh hawj cidu doiqciep gozci；gyalaeg gaijgwz aen dijci vaimou；gyalaeg gaijgwz aen dijci guenjleix canghseng’eiq guekrog douzswh caeuq doiq rog douzswh；gaijndei gij baijbouh ranghdieg hailangh；laebndei aen gihci doicaenh caetliengh sang bae caezlaeb “it rangh it loh”.
Daihngeih, yawjnaek cauhlaeb gij dijci gihci haeujcoengh cienzmienh cauhmoq. Gietdinghgauj gyoebgyonj doengzcaemh gaijgwz gij dijci gihci yiengh vunzcaiz gyauyuz gohgi, daegbied daezok aeu gyalaeg gyonjhab gaijgwz gyauyuz、gyalaeg gaijgwz aen dijci gohgi、gyalaeg gaijgwz gij dijci gihci gungganq vunzcaiz, hawj daengx aen dijhi cauhmoq guekgya lai ndaej cingjdaej langh rengz.
Cimdoiq baenzlawz gaijgwz gij dijci gyauyuz, daezok faenloih doihaeuj gauhyau gaijgwz, laebhwnj gij gihci ndalaeb diuzcingj yozgoh caeuq gij vunqsik gungganq vunzcaiz youz gohgi hwngfat、guekgya canloz aeuyungh dazyinx, lai gvaq bingzciengz bae baijbouh gij yozgoh ciennieb gaenjyungh；laebndei aen gihci gauhyau cauhmoq gohgi, hawj cwngzgoj engq vaiq engq lai ndaej baenzyungh.
Cimdoiq baenzlawz gaijgwz gij dijci gohgi, daezok lai roengzrengz gyaak gij rengzlig yiengh gohgi hawjrengz daengxbuenz guekgya, engq ndei bae dinghvih caeuq ndabaij doengh aen gihgou guh gohyenz guekgya、doengh aen dayoz ak guh yenzgiu suijbingz sang、doengh aen giyez gohgi lingxdaeuz, gaijndei gij hongsaeh guenjleix gohgi giva, dawznaek daj yawj bae gyae、ndaej yinxlingx bae baijbouh aen lingjyiz gihcuj yenzgiu、aen lingjyiz camca lingxdaeuz、aen lingjyiz cungdenj；lai gyarengz coengh giyez baenz gij cawjdaej guh gohgi cauhmoq, laebhwnj aen gihci gungganq guhhung aen giyez gohgi lingxdaeuz；cinjhawj doengh gij swyez danhvei guh gohyenz beij itbuen swyez danhvei engq lingzvued guenjleix, damqra gij yiengh ciuq giyez bae guenj；gyalaeg gaijgwz gij yienghsaeh hawj gienz boux guh gohgi gaemmiz roxnaeuz sawjyungh gij gohgi cwngzgoj mwh dangsaeh guh’ok.
Cimdoiq baenzlawz gaijgwz gij dijci gihci gungganq vunzcaiz, daezok gyavaiq ganq’ok gij vunzcaiz guekgya canloz aeuyungh, hawj gak loih vunzcaiz suciz engq ndei bae；laebndei aen gihci ra’ndaej、genjaeu、gungganq gij vunzcaiz cauhmoq bouxcoz, engq ndei baujcang gij dakdaih gyoengq bouxcoz guh gohgi；gyarengz guh gij gihci gikleih vunzcaiz, dawzdingh hawj gienz aen cawjdaej yungh vunz、hawj vunzcaiz soengcag； laeb caezcienz aen gihci baujcang haeujcoengh yinxhaeuj vunzcaiz rog guek.
Daihsam, yawjnaek cienzmienh gaijgwz. Gietdinghgauj ciuq aen gvaengxgyaq dungjcouz doicaenh aen cungjdaej baijbouh “haj yiengh gap baenz aen”、boiqhab doicaenh aen canloz baijbouh “seiq aen cienzmienh”, bae maeuzveh caiq cienzmienh gyalaeg gaijgwz, naemj daengxbuenz baijbouh bae gaijgwz ginghci dijci caeuq gaijgwz gak aen lingjyiz wnq.
Cimdoiq baenzlawz gaijgwz aen lingjyiz minzcuj caeuq fapceih, faenbied doiq laebcaez aen cidu dijhi yiengh yinzminz minzcuj ronzdoeng goekbyai、laebndei aen dijhi fapceih yiengh sevei cujyi miz gij daegsaek Cungguek guh’ok baijbouh. Daezok gyarengz laebguh aen cidu yinzminz danggya guhcawj；laebcaez gij gihci yiengh minzcuj doxyaeng； laebcaez gij cidu gihcwngz minzcuj；laebndei aen gvaengxgyaq guh hong daih dungjcan. Daezok gyarengz cimdoiq aen lingjyiz cungdenj、aen lingjyiz ngamq hwng、aen lingjyiz nangq daengz guekrog laebfap； laebcaez gij dijci gihci genhcaz gihgvanh、gungh’anh gihgvanh、genjcaz gihgvanh、saemjbuenq gihgvanh、swhfaz hingzcwng gihgvanh gag dawz faenhhong bonjfaenh, gienzgamcaz、gienzdamqcaz、gienzgenjcaz、gienzsaemjbuenq、gienzcaephengz dox boiqhab、dox hanhhaed； laebndei aen gihci doihaeuj hwnqguh aenbiengz fapceih.
Cimdoiq baenzlawz gaijgwz vwnzva dijci, dawznaek doicaenh gij yendaiva yiengh Cungguek dwg yiengh yendaiva vuzciz vwnzmingz caeuq cingsaenz vwnzmingz doxha, daezok doidoengh gij hongsaeh son’gyauq lijsiengj saenqniemh baenz cidu baenz ciengzseiz guh, gaijndei aen gihci cauhmoq gaiq hong gungganq vwnzmingz、saedguh vwnzmingz、cauhlaeb vwnzmingz；gaijndei aen gihci gunghawj yiengh fugsaeh vwnzva caeuq gij canjbinj vwnzva, laebhwnj aen gihci cigsoh soengq vwnzva swhyenz ndei daengz gihcwngz；laebcaez aen dijhi gyoebhab ceihleix vangjloz；doicaenh dauqlaeb aen gapgyaq doiq rogguek cienzboq, cauhlaeb aen dijhi doiq rogguek cienzboq engq riuz engq ndei.
Cimdoiq baenzlawz laebcaez aen cidu dijhi baujcang caeuq gaijndei gwndaenj beksingq, daezok laebndei aen cidu faenboiq souhaeuj, gveihfan aen bouhloh faenboiq souhaeuj；gaijndei aen vanzging laeb gij cwngcwz aeu cauhnieb coicaenh couhnieb, haeujcoengh caeuq gveihfan bae hwngfat gij yiengh couhnieb moq; laebcaez gij sebauj cidu boux gag ragwn、nungzminzgungh、boux guh gij yiengh couhnieb moq, cienzbouh siubae cungj hanhhaed baengh huciz youq dieg couhnieb camgya baujyiemj；daezok gyavaiq laebhwnj yiengh vunqsik moq hwngfat fangzdicanj, cungfaen hawj gij cwngfuj gak aen hawsingz miz gienz gag guhcawj bae diuzgung aen hawciengz fangzdicanj; daezok gyalaeg gaijgwz aen dijci yihyoz veiswngh, saedhengz aen canloz hwngfat gij saehnieb ndangcangq baiz youq gonq；daezok laebcaez aen dijhi haeujcoengh caeuq fugsaeh vunzgyaeuj demlai, laebndei aen cwngcwz dijhi haeujcoengh senglwg caeuq aen gihci gikleih senglwg, laebndei gij cwngcwz gihci hwngfat saehnieb ciengxlaux caeuq canjnieb ciengxlaux, ciuq aen yenzcwz gagnyienh、ndaej bienq, onjdangq miz bouhloh bae doicaenh yiengh gaijgwz cugciemh doilaeng aen bisoq duiyouh fapdingh.
Cimdoiq baenzlawz gaijgwz aen dijci swnghdai vwnzmingz, daezok laebndei aen dijci giekdaej swnghdai vwnzmingz, laebcaez aen dijhi ceihleix swnghdai vanzging, laebcaez gij gihci loegsaek danqnoix bae hwngfat； daezok aen cidu guenjleix swnghdai vanzging dwg faen ranghdieg、miz cengca、dawzcinj guenjhanh haenx, laebcaez aen gihci giz gap giz doxbouj baujhoh swnghdai, saedhengz gij cwngcwz caizsui、ginhyungz、douzswh、gyagwz caeuq gij dijhi biucinj haeujcoengh yiengh hwngfat loegsaek danqnoix, gyavaiq gviveh hwnqguh aen dijhi nwngzyenz yienghmoq.
Daihseiq, yawjnaek dungjcouz hwngfat caeuq ancienz. Guekgya ancienz dwg aen giekdaej youqgaenj hawj gij yendaiva yiengh Cungguek byaij onj byaij gyae. Gietdinghgauj cuengq yiengh saeh henhoh guekgya ancienz youq gizdieg engqgya youqgaenj, hopheux doicaenh aen dijhi caeuq gij naengzlig guekgya ancienz habngamj yienhdaih aeuyungh, daezok cauhlaeb aen dijhi fuengzhen guekgya ancienz gapfwngz guh gig mizyauq haenx, doicaenh gohgi coenghrengz gyamaenh guekgya ancienz； laebcaez aen dijhi baujcang cawqceq gij goenggungh saehgienh fwtfat； laebhwnj aen cidu gamguenj yinzgungh cinwngz ancienz； damqra laebhwnj aen cidu guenjleix vunzgyaeuj daengx guek caezcaemh haenx； laebndei aen dijhi cingjdaej fuengzhaed cianh ndawbiengz, ciuqfap yiemzfad gak yiengh famhfap famhcoih cungqvunz fanjyingj haenqrem haenx. Daezok laebhwnj laebcaez aen gihci gapguh gaiq hong bauj gij ancienz seiqhenz guek raeuz； laebcaez aen gihci fanj ceihcaiz、fanj capfwngz、fanj “iet gen daeuj guenj”； laebcaez aen gihci fuengzre gaemhanh fungyiemj mouyiz, laebndei gij dijhi faplwd fapgvi caeuq gij dijhi saedhengz fapceih nangqdaengz guekrog, gyalaeg caeuq guekwnq doxgap caepfap dawzfap. Hopheux laebdaeb gyalaeg gaijgwz gozfangz caeuq bingdoih, daezok laebndei aen dijci gihci lingjdauj guenjleix bingdoih yinzminz, gyalaeg gaijgwz aen dijhi lienzhab hoenxciengq, gyalaeg yiengh gaijgwz hamj bingdoih caeuq deihfueng.
Daihhaj, yawjnaek gyaak aen Dangj lingjdauj gaijgwz. Aen Dangj lingjdauj dwg daj goekgaen bae baujcingq raeuz ndaej caiq cienzmienh gyalaeg gaijgwz、doihaeuj gij yendaiva yiengh Cungguek. Gietdinghgauj daezok laebndei aen gihci doeksaed gij gezcwz baijbouh hungnaek Dangjcunghyangh； gyalaeg gaijgwz aen cidu guenj yinzsw ganbu, doekdingh laebhwnj aen dazyiengq cingqdeng genj vunz yungh vunz, roengzrengz genjok boux ganbu cwngci dingj ndaej gaujniemh、gamj bae dawz rap、naebsim gaijgwz、cingzcik ok lai、goengcingq cinghseuq de, roengzrengz gaijgez gij vwndiz ganbu luenh guh saeh、mbouj guh saeh、mbouj gamj guh saeh、mbouj rox guh saeh; laebhwnj caeuq hengzguh yiengh cwngcizgvanh cingqdeng, aeu guhdaengz “sam yiengh faen okdaeuj”, gikcoi ganbu hailoh baenaj、guhsaeh cauhnieb； gyaak gij cwngci gunghnwngz caeuq cujciz gunghnwngz dangjcujciz； laebcaez gij cidu gihci fuengzceih hingzsiz cujyi、gvanhliuz cujyi, laebcaez aen gihci caez caz caez ceih gij saeh mbouj cingq caeuq nduknaeuh, lai miz banhfap ndei bae fuengzceih yiengh nduknaeuh moq caeuq yiengh nduknaeuh ndumjndaw.
Maqmuengh gak boux dungzci laegdaeuq roxyiuj gij cingsaenz Dangjcunghyangh, gaenjndaet hopheux aen cawjdaez cienzhoih bae yaenglwnh, daezok gij yigen caeuq genyi coihgaij miz yungh de, doengzcaez hai ndei baez cienzhoih neix、coihgaij ndei faenh gietdinghgauj neix.
来源：中央宣传部
桂公网安备 45010302000292号